أى كلام

.... هذه قصيدة لى فيها شئ من السعادة

... شئ من التفاؤل فيها

.... شئ من المرح

... إذا أردت شيئًا من هذا فى يوم كهذا فها هى

أى كلام

جايلى مزاج النهاردة إنى أكتب أى كلام

لو عاجبك قول موافق مش عاجبك قول سلام

متخفش ع الاخلاق والقيم ، محفوظين

كلامنا ايوه خفيف لكن فى قمة الاحترام

*********************

قلبى النهاردة سعيد من غير وجع
وفى البداية قلبى م الفرحة انفجع

دلوقت يعزف الالحان كما بيتهوفن

يرقص على الالحان كما ف بحيرة البجع

*********************

قلبى النهاردة سعيد قلت نفرح سوا

نرسم بسرعه كدا كام لوحة ع الهوا

يعدى واحد يقول دولا اكيد مجانين

بكرة يرموا البلح ويكلوا بدله النوى

***********************

قلبى النهاردة سعيد ف قمة الانشكاح

لا حابكى ع اللبن ولا ع التلج اللى ساح

لا يشغلنى اللى حصل ولا فكر فى اللى فات

أنا حاعمل أيه يعنى ؟ ما هو اللى راح راح

**********************

قلبى النهاردة سعيد مفهش خوف

وحاجة غريبة تانية م الفرحة مش مكسوف

كنت بخاف اللى جاى لمجرد أنه جاى

دلوقت بانتظره بشوق وأنا ملهوف

*********************

قلبى النهاردة سعيد وراضى
لا بأمرعسكرى ولا حكم قاضى
كان نفسى اققولك ليه قلبى سعيد لكن
بصراحة مش رايق ومش فاضى

تحياتى وكل عام وأنتم بخير